سعید غنی کی زیر صدارت لوکل گورنمنٹ کمیشن کا اجلاس

کراچی (پاک نیوز24)وزیر بلدیات سندھ و چیئرمین سندھ لوکل گورنمنٹ کمیشن سعید غنی کی زیر صدارت لوکل گورنمنٹ کمیشن کا اجلاس منعقد ہوا۔ اجلاس میں ایڈیشنل سیکرٹری لوکل گورنمنٹ و سیکرٹری کمیشن سید خالد حیدر شاہ، ارکان عبدالرحیم سومرو، وسیم احمد ارسانی، علی احمد بلوچ سیکرٹری قانون، ڈی جی کمیشن ابوبکر مدنی، ٹاؤن چیئرمین ابراہیم حیدری ٹاؤن نذیر بلوچ، میونسپل کمیشنر اور میونسپل کمیشنر گڈاپ احمد یار، حاجی شریف شیخ و دیگر بھی موجود تھے۔ اجلاس میں گڈاپ اور ابراہیم حیدری ٹائون کے مابین مویشیوں کے ٹیکس کی وصولی کے تنازعے کے حل کے حوالے سے دونوں ٹائونز کے زمہ داران نے اپنے اپنے موقف کو سامنے رکھا۔ اجلاس میں مشاورت کے بعد صوبائی وزیر نے کہا کہ کمیشن کوئی بھی فیصلہ قانون کے مطابق ہی کرے گی اور ہم نے پہلے بھی دونوں ٹائونز کو مشورہ دیا تھا کہ وہ دونوں باہمی مشاورت کرکے اس تنازع کو حل کریں تاہم ابھی تک اس پر عمل درآمد نہیں ہوا۔ اس لئے یہ کمیشن دونوں ٹائونز کو ایک بار پھر 20 اگست تک کی مہلت دے رہی ہے کہ وہ باہمی مشاورت سے اس تنازع کو حل کرلیں اور 20 اگست تک اپنی جو مشاورت ہو وہ کمیشن کو جمع کروادے، جس کے بعد کمیشن اس کا کوئی حتمی فیصلہ کرے گی۔ اجلاس میں شاہ فیصل اور کورنگی ٹاؤن میں تنازع پر سیکرٹری قانون و کمیشن کے دو ممبران کو دونوں ٹائونز کے چیئرمینز سے علیحدہ علیحدہ ملاقات کرکے رپورٹ مرتب کرکے رپورٹ کمیشن میں جمع کرانے کی ہدایات کی ہے۔