پولیس شہدا کی لازوال قربانیاں رائیگاں نہیں جائیں گی، بلاول بھٹو زرداری

کراچی (پاک نیوز24)چیئرمین پیپلز پارٹی بلاول بھٹو زرداری نے شہدائے پولیس کے قومی دن پر فرائض کی ادائیگی کی خاطر جان قربان کرنے والے پولیس کے بہادر افسران اور جوانوں کو شاندار الفاظ میں خراج عقیدت پیش کیا ہے۔ میڈیا سیل بلاول ہاؤس سے جاری پریس ریلیز کے مطابق چیئرمین پی پی پی نے اپنے پیغام میں کہا کہ قانون کی حکمرانی اور شہریوں کی حفاظت کے لئے پولیس شہدا کی غیر متزلزل لگن اور بے لوث خدمات ان کے عزم کی آئینہ دار ہے، چاروں صوبوں کے پولیس اہلکاروں نے دہشت گردی کے خلاف بھی جوانمردی سے جنگ لڑی اور لازوال قربانیاں دی ہیں، ان کی قربانیاں رائیگاں نہیں جائیں گی، انہوں نے قربانیاں دے کر عوام کی حفاظت اور انصاف و دیانتداری کی اقدار کی پاسداری کی ہے،شہید افسران و جوانوں کو خراج عقیدت پیش کرتے ہیں۔ بلاول بھٹو زرداری نے کہا کہ جب ہم اپنے شہید ہیروز کو یاد کرتے ہیں، ہمیں اپنی پولیس فورس کی جاری کاوشوں اور جرأت کی حوصلہ افزائی کرنی چاہیے، جو قومی جذبے کے ساتھ خدمات سرانجام دے رہے ہیں، پیپلز پارٹی پولیس شہدا کے خاندانوں کے ساتھ اظہار یکجہتی اور سلام پیش کرتی ہے۔