پکنک پر جانیوالی تیز رفتار بس الٹ گئی، خاندان کے 7 افراد جاں بحق

کراچی (پاک نیوز24)کراچی میں پکنک منانے کے لیے ہاکس بے جانے والی بس خوفناک حادثے کا شکار ہوگئی، ماڑی پور کے قریب بس الٹنے سے خواتین اور بچوں سمیت 7 افراد جاں بحق اور 14 زخمی ہوگئے۔پکنک پر جانے والی بس کو حادثہ ماڑی پور نیو ٹرک اڈا گیٹ نمبر 6 ماما گودام کے قریب پیش آیا،جہاں ٹریلر سے بچنے کی کوشش میں تیز رفتار بس ڈرائیور سے بے قابو ہو کر فٹ پاتھ سے ٹکرانے کے بعد الٹ گئی، جس کے نتیجے میں ایک ہی خاندان کے 7 افراد جان سے ہاتھ دھو بیٹھے، جاں بحق افراد میں 3 بچے، 3 خواتین اور ایک نوجوان شامل ہے۔اسپتال انتظامیہ کا کہنا ہے کہ حادثے کے 14 زخمیوں کی شناخت کرلی گئی ہے جس میں 6 سے 7 زخمیوں کی حالت تشویشناک ہے۔اسپتال انتظامیہ کے مطابق حادثے میں جاں بحق ہونے والے 7 افراد کی لاشیں ٹراما سینٹر لائی گئیں، سول اسپتال لائی جانے والی میتوں کو سہراب گوٹھ سرد خانے منتقل کر دیا گیا ہے۔ریسکیو ذرائع کے مطابق جاں بحق ہونے والوں میں 40 سالہ صغرا زوجہ غلام علی، 45 سالہ سعدیہ زوجہ احمد، 6 سالہ سکینہ دختر منظور عالم، 4 سالہ زینت دختر حیات، 10 سالہ کنزہ دختر احمد، 14 سالہ قدیر ولد عبدالجبار شامل ہے جبکہ جاں بحق ہونے والی ایک خاتون کی شناخت نہیں ہوسکی۔پولیس کے مطابق بس میں سوار افراد پکنک منانے ہاکس بے جارہے تھے، لاشوں اور زخمیوں کو سول اسپتال منتقل کردیا گیا۔پولیس کا کہنا ہے کہ بس میں ایک ہی خاندان کے 30 سے زائد افراد سوار تھے، جن کا تعلق عزیزآباد بھنگوریہ گوٹھ سے ہے، متاثرہ خاندان عزیزآباد کا رہائشی ہے جبکہ بس میں زیادہ تعداد بچوں اور خواتین کی تھی۔پولیس کے مطابق حادثے کا سبب بننے والے ٹریلر کا ڈرائیور موقع سے فرار ہوگیا جبکہ ٹریلر کو تحویل میں لے لیا گیا۔دوسری جانب بس حادثے کے عینی شاہد کا بتانا تھا کہ حادثہ ٹریلر کے موڑ کاٹنے کے باعث پیش آیا جس کے بعد تیز رفتار بس فٹ پاتھ سے ٹکرائی اور الٹ گئی۔گورنر سندھ کامران ٹیسوری نے ماڑی پور میں بس حادثے پر افسوس کا اظہار کرتے ہوئے مرحومین کی مغفرت اور لواحقین کے لئے صبر جمیل کی دعا کی، انہوں نے زخمی افراد کی جلد صحت یابی کی دعا بھی کی۔گورنر نے کمشنر کراچی اور ایڈیشنل آئی جی کراچی پولیس سے بس حادثے سے متعلق رپورٹ طلب کرتے ہوئے متعلقہ حکام کو ہدایت کی کہ زخمیوں کو ہرممکن طبی سہولیات فراہم کی جائیں۔ ادھر وزیر اعلیٰ مراد علی شاہ نے افسوس کا اظہار کرتے ہوئے کہا کہ انسانی جانوں کے نقصان پر انتہائی دکھ ہوا ہے۔وزیراعلیٰ نے سول اسپتال، ٹراما سینٹر اور جناح اسپتال انتظامیہ کو زخمیوں کا بہترین علاج کرنے کی ہدایت کی ۔مراد علی شاہ نے آئی جی سے حادثے کی تفصیلی رپورٹ طلب کرتے ہوئے ہدایت کہ ٹریفک پولیس حادثات کی روک تھام کے لیے سخت اقدامات اٹھائے۔