کراچی(17 فروری 2026)یانگو پاکستان ، جو عالمی ٹیکنالوجی کمپنی ینگو گروپ کا حصہ ہے، نے معذور افراد کو بااختیار بنانے کے لیے ناؤ پی ڈی پی کے ساتھ شراکت داری کا اعلان کیا ہے۔ اس اشتراک کے تحت ’’بااختیار پاکستان‘‘ کے نام سے ایک جامع نقل و حرکت اور معاشی مواقع کا پروگرام شروع کیا گیا ہے، جس کا مقصد یانگو کے پلیٹ فارم کے ذریعے معذور افراد کے لیے باعزت روزگار اور کمائی کے مواقع فراہم کرنا ہے۔ یہ اقدام نہ صرف معذور افراد کی معاشی خودمختاری کو فروغ دے گا بلکہ انہیں ٹیکنالوجی کے ذریعے سماجی اور پیشہ ورانہ طور پر فعال کردار ادا کرنے کے قابل بھی بنائے گا۔
یہ اقدام یانگو گروپ کے اس وسیع عزم کی عکاسی کرتا ہے جس کے تحت وہ اپنی مختلف مارکیٹوں میں معاشی بااختیار بنانے کے لیے ایک فعال شراکت دار کے طور پر کام کر رہا ہے۔ اس منصوبے کا بنیادی مقصد معذور افراد کو کمائی کے مواقع تک رسائی میں درپیش رکاوٹوں کو کم کرنا اور انہیں باعزت روزگار کے ذریعے زیادہ سے زیادہ مالی خودمختاری حاصل کرنے کے قابل بنانا ہے، تاکہ وہ معاشی طور پر مستحکم اور خود کفیل زندگی گزار سکیں۔
پروگرام کے ابتدائی مرحلے کے تحت، یانگو پاکستان نے ناؤ پی ڈی پی کی جانب سے شارٹ لسٹ کیے گئے معذور افراد میں پانچ ریٹروفٹ رکشے تقسیم کیے ہیں۔ یہ اقدام نہ صرف مستحق افراد کو فوری طور پر کمائی کے قابل بنانے میں مدد دے گا بلکہ مستقبل میں اس منصوبے کو مزید وسعت دینے اور بیڑے میں اضافہ کرنے کے منصوبے بھی زیر غور ہیں، تاکہ زیادہ سے زیادہ معذور افراد کو اس پروگرام سے مستفید ہونے کا موقع فراہم کیا جا سکے۔
اس پروگرام کی افتتاحی تقریب ناؤ پی ڈی پی کے سینٹر آف ایکسی لینس فار ڈس ایبلٹی انکلوژن، کراچی میں منعقد ہوئی، جس کا افتتاح سندھ کے صوبائی وزیر محنت، اطلاعات اور انسانی وسائل سعید غنی نے کیا۔ تقریب میں اعلیٰ سرکاری حکام، مختلف بین الاقوامی سفارت خانوں کے نمائندوں، اور یانگو پاکستان اورناؤ پی ڈی پی کی انتظامی ٹیموں نے شرکت کی۔ شرکاء نے اس اقدام کو معذور افراد کی معاشی شمولیت اور خودمختاری کے فروغ کی جانب ایک اہم قدم قرار دیا۔
یانگو پاکستان کی کنٹری ہیڈ میرال شریف نے لانچنگ تقریب سے خطاب کرتے ہوئے کہا، ’’معذوری کبھی بھی خواہش اور موقع کے درمیان رکاوٹ نہیں بننی چاہیے، کیونکہ معذور افراد کسی بھی دوسرے شخص کی طرح بھرپور صلاحیتوں کے حامل ہوتے ہیں۔ ہمیں اس پروگرام کے آغاز پر فخر ہے جو رائیڈ ہیلنگ انڈسٹری میں معذور افراد کے لیے کمائی کے پائیدار مواقع فراہم کرنے کی جانب ایک اہم قدم ہے۔ ہم پاکستان میں ڈیجیٹل نقل و حرکت کو فروغ دینے اور بامقصد و دیرپا بااختیار بنانے کے لیے اس نوعیت کی شراکت داریوں کو مزید وسعت دینے کے لیے پُرعزم ہیں۔‘‘
ناؤ پی ڈی پی کے صدر امین ہاشوانی نے اس تعاون کی نظامی اہمیت پر زور دیتے ہوئے کہا، ’’پاکستان میں حقیقی شمولیت کے فروغ کے لیے مضبوط پبلک پرائیویٹ پارٹنرشپس ناگزیر ہیں۔ ’بااختیار پاکستان‘ جیسے اقدامات اس بات کی واضح مثال ہیں کہ کس طرح صنعتی جدت اور سماجی ترقی مل کر ایک زیادہ باشمول معاشرے کی تشکیل میں کردار ادا کر سکتے ہیں۔ معذور افراد کو افرادی قوت کا فعال حصہ بنانا نہ صرف ان کی معاشی خودمختاری کے لیے ضروری ہے بلکہ یہ وقت کی اہم ضرورت بھی ہے۔‘‘
’’بااختیار پاکستان‘‘ جیسے اقدامات کے ذریعےیانگو پاکستان جدت کو مثبت سماجی اثرات کے ساتھ ہم آہنگ کرتے ہوئے اپنے اس کردار کو مزید مضبوط بنا رہا ہے کہ وہ ایک ذمہ دار ٹیکنالوجی پارٹنر کے طور پر معاشی مواقع پیدا کرنے کے لیے پُرعزم ہے۔ یہ اقدام اُن کمیونٹیز کی معاونت کی جانب بھی ایک اہم قدم ہے جن کی خدمت یانگو اپنے پلیٹ فارم کے ذریعے کرتا ہے، تاکہ زیادہ سے زیادہ افراد کو باعزت روزگار اور مالی خودمختاری حاصل کرنے کے مواقع میسر آ سکیں
