جشن آزادی کی تیاریاں عروج پر ، گلیاں ، بازار سبز ہلالی پرچموں اور جھنڈیوں سے سج گئے

کراچی(پاک نیوز24)ملک بھر کی طرح شہر قائد میں بھی جشن آزادی شایان شان انداز سے منانے کیلئے کراچی میں بھی تیاریاں اپنے عروج پر پہنچ گئی ہیں۔ یوم آزادی کے سلسلے میں گلیاں اور بازار سبز ہلالی پرچموں اور جھنڈیوں سے سج گئے۔ایسے میں بچوں کے ساتھ بڑوں کی خوشی بھی دیکھنے کے قابل ہے۔ بچوں کی جانب سے جھنڈے،چشمے، اسٹیکرز، چوڑیاں، کیپ، بینڈزاورقومی پرچم کےرنگوں والے ملبوسات کی خریداری عروج پرہے۔اسٹالوں پر سجاوٹ کےسامان کی ایک سے بڑھ کرایک ورائٹی موجود ہے، دوسری جانب مہنگائی نے دیگر تمام کاروبار کے ساتھ ساتھ موسمی کاروبار پر بھی سخت منفی اثرات مرتب کیے ہیں جس سے تیارکنندگان اور دکاندار دونوں انتہائی پریشان ہیں اور مہنگائی کا شکوہ کرتے نظر آرہے ہیں۔جھنڈا گلی میں دکانداروں نے نجی ٹی وی سے بات کرتے ہوئے کہا شہریوں میں جوش و خروش پہلے سے بھی زیادہ ہے مگر مہنگائی کی وجہ سے پہلے سے اشیاء مہنگی ہوگئی ہیں جو عام شہری کی پہنچ سے دور ہوگئی ہیں۔ارض پاک سے محبت کے اظہار کے لئے ہر کوئی آزادی کی خوشیوں میں اپنے اپنے طریقے سے حصہ لینے کے لئے تیار ہے۔والدین نے بات کرتے ہوئے کہا بچوں کی ضد پر ان کو جشن آزادی کے حوالے سے خریداری کروانے آئے ہیں تا کہ وہ اپنے اسکولز کی تقاریب میں حصہ لے سکیں۔بچوں میں وطن سے محبت اور حب الوطنی کا جذبہ پیدا کرنے کے لئے والدین نے جھنڈے اور بیجز سمیت دیگر ملبوسات کی خریداری کی۔