سندھ حکومت نے 15 سالہ دور میں کچھ نہیں کیا،مصطفی کمال

کراچی (پاک نیوز24)متحدہ قومی موومنٹ پاکستان کے رہنما مصطفی کمال نے کہا ہے کہ وزیرِ اعلیٰ کی 15 سال کی کارکردگی کی پریزنٹیشن اور ان کے تمام ترقیاتی دعوؤں کو رد کرتے ہیں۔سندھ میں اگر کچھ اچھا ہوتا تو ہم ان کی تعریف کرتے، سندھ کے حکمرانوں کے سامنے عوام کا مقدمہ پیش کیا۔ اگر کہیں کام ہوا ہوتا ہے اشتہار لگاکر بتانے کی ضرورت نہیں پڑتی۔ان خیالات کااظہار انہوں نے پریس کانفرنس کرتے ہوئے کیا۔کراچی کے سابق ناظمِ اعلیٰ وزیر اعلیٰ مراد علی شاہ پر برس پڑے۔ان کا کہنا تھا کہ ترقی کہہ کر نہیں دکھائی جاتی بلکہ ترقی خود ہی بتاتی ہے کہ وہ واقع ہوئی ہے۔سندھ حکومت نے اپنے 15 سالہ دور میں کچھ بھی نہیں کیا۔انہوں نے کہا کہ سندھ حکومت نے عوام کی آنکھوں میں دھول جھونکنے کی کوشش کی، اربوں روپے صرف اشتہارات پر لگائے جا رہے ہیں، یہ پیسہ کسی کا ذاتی نہیں میرا اور آپ کا پیسہ ہے۔ایم کیو ایم رہنما کا کہنا تھاکہ جہاں کام ہوتا ہے وہاں حکومت کو اشتہار لگا کر بتانے کی ضرورت نہیں پڑتی، تعلیم پر 3200 ارب خرچ کیے گئے، 76 لاکھ بچے اسکولوں سے باہر ہیں۔مصطفی کمال نے کہا کہ میرے زمانے میں کراچی دنیا کے تیزی سے ترقی کرنے والے 12شہروں میں شامل تھا، اپنے دور میں کراچی میں 3 سو ارب روپے خرچ کیے تھے، 3 سو ارب روپے کا ایک یک پیسہ کراچی پر لگایا تھا۔ان کا مزید کہنا تھا کہ صحت کے شعبے میں سندھ حکومت نے 1700 ارب روپے خرچ کیے، اسپتالوں کو فنڈ دینے والے مخیر حضرات کو ہٹا دیں تو صحت کے شعبے کی اصلیت معلوم ہو جائے گی۔اُن کا کہنا تھا کہ وزیراعلیٰ نے سندھ کی غلط تصویر پیش کرنے کی کوشش کی ۔