سندھ حکومت 26 لاکھ گھروں کو مفت سولر دیگی،وزیر بلدیات

کراچی (پاک نیوز24)وزیر بلدیات سندھ سعید غنی نے کہا ہے کہ سندھ حکومت صوبے کے 26 لاکھ گھروں کو مفت سولر فراہم کرے گی جبکہ جلد ہی آسان اقساط پر عام لوگوں کو سولر کی فراہمی کے لئے پبلک پرائیویٹ پارٹنر شپ کے تحت اقدامات کیے جارہے ہیں۔ ایم کیو ایم آج کل جن حالات کا شکار ہے وہ سب کو معلوم ہے، ان کو تنقید کا حق ہے اور ہم اس کا جواب بھی دیں گے۔ ان خیالات کا اظہار انہوں نے صحافیوں کی جانب سے اپنے اعزاز میں مقامی ہوٹل میں دئیے گئے ظہرانے سے خطاب کرتے ہوئے کیا۔ تقریب میں ڈپٹی میئر سلمان عبداللہ مراد، ڈی جی کے ڈی اے شجاعت حسین، سی او او واٹر بورڈ اسد اللہ خان، ٹاؤن چیئرمین چنیسر ٹاؤن فرحان غنی، سندھ سالڈ ویسٹ کے ڈائریکٹر رحمت اللہ شیخ، پی ایس ایف کراچی کے صدر مدنی رضا، کنسٹریکشن ایسوسی ایشن سندھ کے چیئرمین نعیم کاظمی، سعید مغل کے علاوہ بلدیاتی رپورٹرز کی بڑی تعداد موجود تھی۔ سعید غنی نے کہا کہ اس وقت بجلی کا بحران ایک طرف بجلی کے بڑھتے ہوئے بلز نے عوام کو پریشانی میں مبتلا کردیا ہے۔ انہوں نے کہا کہ چیئرمین بلاول بھٹو نے اپنے انتخابی منشور میں غریبوں کو مفت بجلی دینے کا جو وعدہ کیا تھا اس پر سندھ حکومت عمل درآمد کررہی ہے اور ہم 26 لاکھ ایسے گھروں کو جہاں بجلی کا کوئی نیٹ ورک نہیں انہیں مفت سولر فراہم کررہے ہیں جس سے وہ اپنے گھر میں پنکھا اور لائٹ جلاسکیں گے ۔ انہوں نے کہا کہ دوسری جانب وزیر توانائی سندھ سے بات کی ہے کہ پبلک پرائیویٹ پارٹنر شپ کے تحت جو لوگ مہنگی بجلی استعمال کرتے ہیں انہیں آسان اقساط پر سولر فراہم کیے جائیں تاکہ وہ بجلی کے ماہانہ بل سے ادائیگی کرکے سولر کے مالک بن سکیں۔ ایک سوال کے جواب میں وزیر بلدیات نے کہا کہ بجلی کے بلوں میں میونسپل ٹیکس کا اصل فائدہ کراچی کے عوام کو ہوگا کیونکہ یہ ٹیکس کئی سال سے لاگو ہے اور اس کے جمع کرنے کے لئے ماضی میں ایک فرم کو کنٹریکٹ دیا گیا لیکن اس نے 6 کروڑ جمع کیے اور اس کی فیس اس سے زائد وصول کی۔ انہوں نے کہا کہ کراچی میں لوڈشیڈنگ کو کم سے کم کرنے اور بالخصوص رات کے اوقات میں لوڈشیڈنگ نہ کرنے کے حوالے سے کے الیکٹرک سے متعدد مٹینگز ہوئی ہیں اور جلد ہی اس کے اثرات عوام کو ملنا شروع ہوجائیں گے۔ ایک سوال کے جواب میں سعید غنی نے کہا کہ ایم کیو ایم کی جانب سے شہید ذوالفقار علی بھٹو کے حوالے سے جو بات کی گئی ہے وہ کسی صورت سمجھ سے بالاتر اور حیرت انگیز ہے۔ ایک اور سوال پر انہوں نے کہا کہ یوسیز کے فنڈز کو 5 لاکھ سے بڑھا کر 12 لاکھ کردیا گیا ہے تاکہ وہ ترقیاتی کام کروا سکیں گے۔ ان کا کہنا تھا کہ چند بجلی چوروں کی سزا ہم سب بھگت رہے ہیں اور ان کے بل بھی ہم بھر رہے ہیں۔ کے الیکٹرک بجلی چوروں کے خلاف بھرپور کارروائی کرے سندھ حکومت ہر ممکن ساتھ دے گی ۔ موسمیاتی تبدیلیوں کے حوالے سے ان کا کہنا تھا کہ سندھ حکومت نے تمام صوبوں کے مقابلے زیادہ اقدامات کیے ہیں اور اس کا اقرار عالمی سطح پر بھی کیا گیا ہے۔