سیلانی کی جانب سے غزہ کیلئے امداد ی سامان کی کھیپ روانہ

کراچی(پ ر )سیلانی ویلفیئر انٹرنیشنل ٹرسٹ کی جانب سے غزہ کے متاثرہ افراد اور خاندانوں میں ضروری امدادی سامان کی دوسری کھیپ استنبول سے فلسطین روانہ کردی گئی۔امدادی سامان سے بھرا ہوا کنٹینر پہلے مرحلے میں مرسن کی بندرگاہ پہنچ گیا ہے جہاں سے وہ بذیعہ بحری جہاز مصر پہنچایا جائے گا اور وہاں سے خشکی کے راستےغزہ تک پہنچے گا۔اس دوسرے مرحلے میں چالیس فٹ طویل کنٹینر میں دو ہزار امدادی سامان سے بھرے پیکٹس روانہ کیے گئے ہیں۔ ان امدادی ڈبوں میں تیار شدہ خوراک بھیجی گئی ہے ۔سیلانی ویلفیئر انٹرنیشنل ٹرسٹ کے بانی و چیئرمین حضرت مولانا محمد بشیر فاروق قادری نے ترکیہ کے صدر طیب اردگان اور ترکیہ کے فلاحی ادارے ’’افاد‘‘ کے رضاکاروںکے جذبہ خیر سگالی پر ان کا شکریہ ادا کیا ہے۔غزہ کے مسلمانوں کے لیے سیلانی کی جانب سے یہ امدادی سلسلے کا تیسرا مرحلہ ہے۔اس سے قبل ایک کنٹینر پاکستان اور دوسرا ترکیہ سے غزہ پہنچ چکا ہے۔یہ امداد ترکیہ میں مرسن کی بندرگاہ کے ذریعے مصر کے راستے غزہ تک پہنچا ئی جائے گی ۔اس سے قبل سیلانی ریجنل آفس استنبول سے ہی بیس فٹ طویل کنٹینر میں ایک ہزار پیکٹ روانہ کیے جاچکے ہیں۔ انہوں نے بتایا کہ امدادی قافلے کی روانگی کا دارومدار بندرگاہ میں جہاز کے لیے جگہ کی دستیابی پر ہے۔وہاں سے پیغام ملنے کے بعد ہی استنبول سے امداد کی اگلی کھیپ روانہ کی جاتی ہے۔ جیسے ہی بندرگاہ پر جگہ دستیاب ہوگی مزید امدادکے ہزاروں پیکٹس تیار کرکے غزہ کے لیے روانہ کردیے جائیں گے۔مولانا بشیر فاروق کے مطابق سیلانی انٹرنیشنل کا عزم ہے کہ وہ غزہ کے مظلوم اور جنگ کے اثرات کے شکار مسلمانوں کی مسلسل مدد کرتے رہیں گے۔امدادی سرگرمیوں کی فراہمی لاجسٹک سہولتوں سے مشروط ہے۔