کراچی و سندھ بھر میں پاک فوج کے شہداء کے حق میں ریلیوں کا انعقاد

  کراچی و سندھ بھر میں پاک فوج کے شہداء کے حق میں ریلیوں کا انعقاد کیا گیا اور 9 مئی کے واقعات کی مذمت کی گئی۔مختلف شعبہ ہائے زندگی سے تعلق رکھنے والے خواتین و حضرات اور بچوں نے ریلیاں نکالیں۔کراچی سمیت سندھ کے دیگر اضلاع میں ریلیوں کا اہتمام کیا گیا۔سجاول، ٹھٹھہ و بدین میں متعد افراد نے ریلیاں نکالیں۔حیدرآباد، سکھر، ٹنڈو محمد خان اور کشمور میں بھی ریلیاں نکالی گئیں۔میر پور خاص، نوشیرو فیروز، لاڑکانہ جیکب آباد میں عوام کا پر جوش سمندر پاک فوج کے حق میں نعرے بلند کرتا ہوا مختلف ریلیوں کی شکل میں امڈ آیا۔ریلیوں میں موجود شرکاء کا کہنا تھا کہ 9 مئی پاکستان کی تاریخ کا سیاہ باب ہے اور اس گھناونے عمل میں شامل شر پسند اور ملک دشمن عناصر کو قرار واقعی سزا ملنی چاہئیے۔شرکاء نے کہا کہ پاک افواج اور شہداء پاکستان عوام کے ماتھے کا جھومر ہیں ہم اپنے شہداء کی یاد گاروں کی بے حرمتی کسی صورت برداشت نہیں کر سکتے۔سانحہ 9 مئی کو ایک سال بیت گیا مگر وہ تلخ یادیں آج بھی تازہ ہیں اور شر پسند عناصر کی سنگینی کو ظاہر کرتی رہتی ہیں۔پاکستان کے عوام پاک فوج سے بے پناہ محبت کرتے ہیں, شر پسند عناصر جتنا مرضی پروپیگنڈا کریں عوام کے دلوں سے فوج کی محبت میں رتی برابر بھی کمی نہیں لاسکتے۔عوام کی بڑی تعداد نے کراچی و سندھ بھر کے مختلف اضلاع، چھوٹے بڑے شہروں اور قصبوں میں ریلیاں نکالیں۔