کورنگی اور دیگر صنعتی علاقوں میں تجاوزات کی روک تھام اور تجاوزات کے خاتمہ کی بھرپور مہم شروع کی جاے گی، کمشنر کراچی
صنعتکاروں کو مختلف بلدیاتی امور سے متعلق ٹیکسوں کی ادائگی میں درپیش دشواریوں کو دور کیا جائے گا۔
ڈپٹی کمشنر کورنگی مسعود بھٹو اورایسوسی ایشن کے صدر جنید نقی زبیر چھایا اور مسعو نقی کی شرکت۔
کراچی (اسٹاف رپورٹر) کمشنر کراچی سید حسن نقوی نے کہا ہے حکومت کراچی میں واقع صنعتی علاقوں کے شہری مسایل کے حل کے لئے ترجیحی کوششیں کررہی ہے، وہ شہر میں واقع تمام صنعتی علاقوں کا دورہ کر کے ان کے شہری مسائل کا جائزہ لیں گے اور ان کے حل کے لئے اقدامات کریں گے۔
انھوں نے یہ بات کورنگی ایسو سی ایشن آف ٹریڈ انڈسٹریز کے عہدیداروں کے ہمراہ کورنگی صنعتی علاقوں کے دورہ اور ایسوسی ایشن کے دفتر میں نمائندہ صنعتکاروں سے خطاب کر تے ہوے کہی۔
انھوں نے کہا کہ صنعتی علاقوں کی ترقی اور شہری مسائل کا حل حکومت کی ترجیحات میں شامل ہے صنعتکاروں کے مسائل کے حل کے لئے صنعتکاروں کی مشاورت سے ترجیحی اقدامات کئے جائیں گے ۔
اس موقع پر ڈپٹی کمشنر کورنگی مسعود بھٹو، ایسوسی ایشن کے صدر جنید نقی، سابق صدر مسعو نقی اور ڈپٹی پیٹرن آف چیف زبیر چھایا بھی موجود تھے کمشنر نے کورنگی صنعتی علاقہ کی ان شاہراہوں اور علاقوں کا دورہ کیا جہاں سٹرکوں کی مرمت تجاوزات اور ٹریفک مسائل سمیت مختلف شہری مسائل کے حل کی کوششوں کہ ضرورت ہے۔
انھوں نے کاٹی کے دفتر میں منعقدہ اجلاس میں صنعتکاروں کے مسائل سنے کمشنر نے کہا کہ صنعتکار ملک کی معیشت کی ریڑھ کی ہڈی کی حیثیت رکھتے ہیں انھیں ہرممکنہ سہولت فراہم کی جائے گی۔
انھوں نے یقین دہانی کرائی کہ کورنگی اور دیگر صنعتکاروں کو درپیش پارکنگ، ایڈ ورٹائزنگ ٹیکس ٹریڈ ٹیکس اور لینڈ یوٹیلائزیشن سمیت ٹیکس کی ادائیگی میں دشواریوں کو دور کیا جائے گا۔
اس سلسلہ میں انھوں نے ڈپٹی کمشنرسے کہا کہ وہ صنعتکاروں سے رابطہ مضبوط بنائیں اور بلدیاتی اداروں کے تعاون سے ان کے مسائل کے حل کے لئے ان کی مشاورت سے اقدامات کریں۔ اور صنعتی علاقہ کے مسائل کے لئے مل کر منصوبہ بندی کریں اقدامات کے لئے کیلینڈر بنائیں اور اس کے مطابق کارروائی کریں اور اقدامات کریں۔
انھوں نے کہا کہ کمشنر کراچی کے دفتر میں ہر ہفتہ شہر میں تجاوزات کی روک تھام کے اقدامات کا جائزہ لیا جا تا ہے جس میں ڈپٹی کمشنرز اور اسسٹنٹ کمشنرز تجاوزات کے خاتمہ اور شہری مسائل کے حل کی کوششوں اور کارروائی کی تفصیلات سے اجلاس کو آگاہ کر تے ہیں۔
انھوں نے کہا کہ آئندہ ہفتہ سے کورنگی اوردیگر صنعتی علاقوں کے تجاوزات اور شہری سہولتوں کے مسائل کے حل کے لئے اقدامات کئے جائیں گے انھوں نے کاٹی کے افسران سے کہا کہ وہ ضلعی انتظامیہ کے افسران سے رابطہ رکھیں
دریں اثنا ڈپٹی کمشنر کورنگی مسعود بھٹو نے کمشنر کو رپورٹ پیش کی ہے کہ انھوں نے کورنگی میں تجاوزات کے خلاف مہم شروع کر دی ہے۔
رپورٹ میں انھوں نے کمشنر کو تصاویر کےء ذریعے ان مقامات کی نشاندہی کی ہے جہاں سے غیرقانوی موٹر پمپ کو ہٹا دیا گیا ہے۔ڈپٹی کمشنر نے کہا کہ وہ کمشنرکے احکامات کے مطا بق کاٹی کے رابطہ اور تعاون سے تجاوزات کی منصوبہ بندی کریں گے اور مربوط کوششیں کریں گے۔
