کراچی(اسٹاف رپورٹر) منیجنگ ڈائریکٹر سندھ سالڈ ویسٹ مینجمنٹ بورڈ زسیدامتیاز علی شاہ نے ایس ایس ڈبلیوایم بی بلنگ پورٹل کا افتتاح کردیا۔
اس موقع پر کاٹی کے صدرجنید نقی، پی ٹی اے (ایس زیڈ)کے صدر گلزار فیروز،سائٹ ایسوسی ایشن کے ایگزیکٹو ممبرسلیم ناگریہ اور نائب صدر خالد ڈھیڈی، ایگزیکٹو ڈائریکٹر آپریشن طارق نظامانی کے علاوہ دیگر افسران اور میڈیا نمائندگان موجود تھے۔
ایم ڈی سالڈ ویسٹ سید امتیاز علی شاہ نے اس موقع پر کہا کہ صنعتی علاقوں میں صفائی ستھرائی کی سہولیات فراہم کرنے میں ویب بلنگ پورٹل اہم کردار ادا کرے گا۔ انہوں نے کہا کہ رہائشی علاقوں کے ساتھ ساتھ سندھ سالڈ ویسٹ مینجمنٹ بورڈکافی وقت سے صنعتی علاقوں میں بھی صفائی ستھرائی کی خدمات انجام دے رہا ہے لیکن بلز بروقت پہنچانے میں مشکلات در پیش تھیں جس کے حل کے لئے ویب پورٹل بنایا گیا ہے۔
اس سلسلے میں تمام ایسوسی ایشن کے نمائندگان کے ساتھ مسلسل رابطے میں بھی ہیں اس ایپ کے ذریعے ہر صنعتی یونٹ اپنی انوائس ڈاؤن لوڈ کرکے ادائیگی کے بعد رسید حاصل کر سکے گا۔
وہ اپنے اکاؤنٹ کی تفصیلات حاصل کرنے کے لئے بھی اس پورٹل کو استعمال کرسکتے ہیں۔اس اقدام کے بعد کاروباری برادری کا وقت بھی محفوظ ہوگااور سالڈ ویسٹ کی اپنی آمدنی کے ذرائع بھی بڑھائے جا سکیں۔ اس پورٹل پرتقریباً 2500 صنعتی یونٹ کا ڈیٹا موجود ہے۔
انہوں نے بتایا کہ اس کے ذریعے صنعتی علاقوں میں صفائی ستھرائی کی بلنگ اور ادائیگی کا میکنزم ڈیجیٹل کردیا گیا ہے اگلے مرحلے میں بینک سے منسلک کردیا جائے گا۔
انہوں نے کہا کہ جدید اقدامات کے ذریعے کام کی رفتار میں اضافہ اور معیار بہتر بنانا ترجیح ہے۔انہوں نے مزید کہاکہ صفائی کی صورتحال میں بتدریج بہتری آرہی ہے۔ ابھی تک جو صنعتی یونٹ شامل نہیں ان سے بات چیت جاری ہے۔
انہوں نے کہا کہ عوام کی آگاہی کے لئے بھی اقدامات کئے جارہے ہیں۔اس موقع پر کاٹی کے صدر نے اپنے خیالات کا اظہار کرتے ہوئے کہا کہ جب سے سالڈ ویسٹ مینجمنٹ بورڈ نے صنعتی علاقوں میں کام کا آغاز کیا ہے ہم بہت مطمئین ہیں یہ اپنی خدمات کا بہت کم معاوضہ لے رہے ہیں اور جب ضرورت ہوتی ہے تعاون کرتے ہیں۔
انہوں نے ایم ڈی سالڈ ویسٹ کا شکریہ ادا کیا اور انکے کام کو سراہا۔پی ٹی اے کے صدر نے کہا کہ صنعتی علاقوں میں بہت کچراپیدا ہوتا ہے اور اس کے لئے ہم بہت پریشان تھے لیکن جب سے سالڈ ویسٹ مینجمنٹ نے کام سنبھالا ہے بہت بہتری آئی ہے۔
سا ئٹ ایسوسی ایشن کے ایگزیکٹو ممبرنے کہا کہ ڈیجیٹل پورٹل کا اقدام خوش آئند ہے انہوں نے ایم ڈی سالڈ ویسٹ کا شکریہ اداکیا۔ اس موقع پر دیگر شرکاء نے بھی اپنے خیالات کا اظہار کیا۔
