ہانگ کانگ (شِنہوا) چین کے ہانگ کانگ خصوصی انتظامی علاقے (ایچ کے ایس اے آر) کی حکومت نے ہانگ کانگ کی مادر وطن کو واپسی کی 29 ویں سالگرہ کے موقع پر پرچم کشائی اور استقبالیہ تقریب کا انعقاد کیا۔
یکم جولائی 2026 کو گولڈن باؤہینیا سکوائر میں منعقدہ پرچم کشائی کی تقریب میں چینی عوامی سیاسی مشاورتی کانفرنس کی قومی کمیٹی کے نائب چیئرمین لیونگ چھون ینگ، ایچ کے ایس اے آر کے چیف ایگزیکٹو جان لی اور ایچ کے ایس اے آر میں مرکزی عوامی حکومت کے رابطہ دفتر کے ڈائریکٹر ژو جی نے شرکت کی۔
تقریب میں ہانگ کانگ میں مرکزی عوامی حکومت کے قومی سلامتی کے تحفظ دفتر، چین کی وزارت خارجہ کے کمشنر دفتر، چین کی پیپلز لبریشن آرمی کے ہانگ کانگ گیریژن کے حکام اور مختلف شعبہ ہائے زندگی سے تعلق رکھنے والے نمائندے بھی موجود تھے۔
’’اودے ٹو دی مدر لینڈ‘‘ کی دھن کے ساتھ پرچم بردار دستہ منظم انداز میں گولڈن باؤہینیا سکوائر میں داخل ہوا اور عوامی جمہوریہ چین کا قومی پرچم اور ایچ کے ایس اے آر کا پرچم لہرایا گیا۔ اس موقع پر ہیلی کاپٹروں نے وکٹوریہ ہاربر کے اوپر پرواز کرتے ہوئے دونوں پرچموں کی نمائش کی جبکہ فائر بوٹ نے پانی کی سلامی پیش کی۔
تقریب کے بعد ہانگ کانگ کنونشن اینڈ ایگزیبیشن سنٹر میں استقبالیہ تقریب منعقد ہوئی۔
تقریب کے دوران ہانگ کانگ کی پہلی خلا باز لائی کا ینگ نے چین کے تیان گونگ خلائی سٹیشن سے ویڈیو لنک کے ذریعے خطاب کیا۔
لائی نے کہا کہ خلائی سٹیشن پر ایچ کے ایس اے آر کا پرچم لہرانا ان کے لئے اعزاز کی بات ہے جس کے ذریعے انہوں نے ملک سے گہری وابستگی اور ہانگ کانگ کے لئے نیک تمناؤں کا اظہار کیا۔ انہوں نے کہا کہ ’’میں دل سے دعا کرتی ہوں کہ ہمارا ملک اپنی سرپرستی اور حمایت کے ذریعے ہانگ کانگ کو مزید خوشحالی اور استحکام عطا کرے۔ آئیں، ہم سب مل کر اپنے وطن اور ہانگ کانگ کے روشن مستقبل کے لئے کوشش کریں۔‘‘
جان لی نے تقریب سے خطاب کرتے ہوئے کہا کہ وہ ہانگ کانگ کی پہلی 5 سالہ ترقیاتی منصوبہ بندی کی قیادت کر رہے ہیں اور اس سلسلے میں عوامی مشاورت کا عمل شروع ہو چکا ہے۔
