کراچی(پ ر ) عالمی موبیلیٹی اور شہری خدمات فراہم کرنے والے پلیٹ فارم ان ڈرائیو نے ایکسون موبل لبریکنٹس اینڈ اسپیشلٹیز کی مارکیٹنگ الائنس ایم اے ایل پاکستان کے ساتھ ملک گیر سطح پر ایک اسٹریٹجک شراکت داری کا معاہدہ کیا ہے۔ اس تعاون کے تحت پاکستان بھر میں ان ڈرائیو کے ڈرائیور موبل کے لبریکنٹس پر خصوصی رعایتوں سے استفادہ کر سکیں گے، جبکہ انہیں موبل کے ملک گیر ریٹیلرز اور ورکشاپس کے نیٹ ورک کی معاونت بھی حاصل ہوگی۔
یہ شراکت داری معاشی خودمختاری اور آپریشنل کارکردگی کے مشترکہ وژن پر مبنی ہے، جس کے ذریعے موبل کی عالمی معیار کی آٹوموٹیو مصنوعات کو ان ڈرائیو کے تیزی سے بڑھتے ہوئے ڈرائیور زنیٹ ورک سے جوڑا جائے گا، تاکہ گاڑیوں کی دیکھ بھال کے اخراجات میں کمی لائی جا سکے اور ڈرائیورز کی آمدنی کے امکانات میں اضافہ کیا جا سکے۔
معاہدے پر دستخط کی تقریب میں کارپوریٹ شعبے کی اعلیٰ اور ممتاز عسکری شخصیات نے شرکت کی، جن میں ان ڈرائیو پاکستان کے کنٹری منیجر اویس سعید، ایم اے ایل پاکستان کے چیف ایگزیکٹو آفیسر خاور جمال، جاز کیش کے چیف ایگزیکٹو آفیسر مرتضیٰ علی، مہمان خصوصی میجر جنرل (ر) سید انیس اکبر، ہلال امتیاز (ملٹری) اور معزز مہمان میجر جنرل (ر) عابد لطیف، ہلال امتیاز (ملٹری) شامل تھے۔
تقریب سے خطاب میں ان ڈرائیو پاکستان کے کنٹری منیجر اویس سعید نے کہاکہ “ہمارے ڈرائیورز گیگ اکانومی کی بنیادی قوت ہیں، اور ان کی گاڑیوں کی بہترین حالت کو یقینی بنانا ان کے معاشی مستقبل کے تحفظ کے لیے ناگزیر ہے۔ یہ شراکت داری ہماری ڈرائیور کمیونٹی کو بااختیار بنانے اور پاکستان میں ایک مضبوط اور مؤثر نقل و حمل کے نظام کی تشکیل کی جانب ایک اہم پیش رفت ہے۔”
اس موقع پر ایم اے ایل پاکستان لمیٹڈ کے چیف ایگزیکٹو آفیسر خاور جمال نے کہا کہ “یہ شراکت داری پاکستان کے نقل و حمل کے شعبے میں مثبت تبدیلی کے لیے موبل کے عزم کی عکاس ہے، جو عالمی معیار کے لبریکنٹس کو جدید ڈیجیٹل سہولیات کے ساتھ یکجا کر کے ڈرائیوروں، ریٹیلرز اور صارفین کو زیادہ بہتر اور مؤثر خدمات فراہم کر رہے ہیں۔”
یہ اقدام بڑھتے ہوئے شہری آپریشنل اخراجات کے پیش نظر ڈرائیورز کو عملی معاونت فراہم کرنے کے لیے ترتیب دیا گیا ہے۔ اسی سلسلے میں اسلام آباد میں ایک خصوصی آٹو اسپا مرکز بھی قائم کیا گیا ہے، جہاں گاڑیوں کی دیکھ بھال اور مرمت کی خصوصی سہولیات فراہم کی جائیں گی۔
اس شراکت داری کے مالیاتی ڈھانچے کو مضبوط بنانے کے لیے جاز کیش نے اپنی ڈیجیٹل ادائیگی کے نظام کو اس منصوبے میں ضم کر دیا ہے، جس کے ذریعے محفوظ، فوری اور کیش لیس لین دین ممکن ہوگا۔ اس انضمام کے نتیجے میں ان ڈرائیو کے ڈرائیورز باآسانی اعلیٰ معیار کے موبل لبریکنٹس خرید سکیں گے اور پلیٹ فارم کی خصوصی مراعات سے فائدہ اٹھا سکیں گے، جبکہ سفر کے دوران نقد رقم ساتھ رکھنے کی ضرورت بھی ختم ہو گی۔
ان ڈرائیو کمپنی ڈرائیورز کے لیے سہولتوں پر مبنی اپنی خدمات کے دائرہ کار کو مزید وسعت دینے کے لیے پرعزم ہے، تاکہ وہ روزمرہ کے چیلنجز کا زیادہ اعتماد اور بہتر کارکردگی کے ساتھ مقابلہ کر سکیں اور ہر سفر میں انہیں مؤثر معاونت فراہم کی جا سکیں۔
