جامعہ کراچی میں منگل کے روز پاکستان کی مسلح افواج اور ان کے حالیہ آپریشن “غضبُ للحق” سے اظہارِ یکجہتی کے لیے ایک عظیم الشان ریلی کا انعقاد کیا گیا۔ ریلی کی قیادت وائس چانسلر پروفیسر ڈاکٹر خالد محمود عراقی نے کی۔ ریلی کا آغاز نئے انتظامی بلاک سے ہوا، جو آزادی چوک تک گئی اور بعد ازاں واپس نئے انتظامی بلاک پہنچ کر اختتام پذیر ہوئی۔
ریلی میں رجسٹرار پروفیسر ڈاکٹر عمران احمد صدیقی، مختلف کلیہ جات کے ڈینز، شعبہ جات کے صدور، اساتذہ، طلبہ اور انتظامی عملے کی بڑی تعداد نے شرکت کی۔ شرکاء نے قومی پرچم اٹھا رکھے تھے اور “پاک فوج زندہ باد” اور “پاکستان زندہ باد” کے فلک شگاف نعرے لگائے۔
سندھ ہائر ایجوکیشن کمیشن کی ہدایات کے مطابق صوبے بھر کے اعلیٰ تعلیمی اداروں میں مسلح افواج سے اظہارِ یکجہتی کے لیے تقریبات اور ریلیوں کا انعقاد کیا جا رہا ہے، کیونکہ افواجِ پاکستان سرحدی علاقوں میں شدت پسند عناصر کے خلاف سرگرمِ عمل ہیں۔ مقررین نے پاک افواج کی لازوال قربانیوں کو خراجِ تحسین پیش کرتے ہوئے ملک کے مختلف علاقوں کو شرپسند عناصر سے پاک کرنے اور عوام کے جان و مال کے تحفظ کے لیے ان کی خدمات کو سراہا۔
اس موقع پر وائس چانسلر پروفیسر ڈاکٹر خالد محمود عراقی نے خطاب کرتے ہوئے کہا کہ پاکستانی افواج اور قوم ہر قسم کے خطرات سے نمٹنے کے لیے ہمہ وقت تیار ہیں۔ انہوں نے کہا کہ ماضی میں افواجِ پاکستان کی جانب سے دشمن عناصر کو دیے گئے موثر اور دندان شکن جوابات اس امر کا واضح ثبوت ہیں کہ ملکی دفاع مضبوط اور ناقابلِ تسخیر ہاتھوں میں ہے۔
انہوں نے مزید کہا کہ کسی بھی معاند ملک کو پاکستان کے خلاف کسی بھی اقدام سے قبل اس کی بہادر افواج، مضبوط دفاعی نظام، وطن پر جان نچھاور کرنے والی قوم اور ایٹمی صلاحیت کو پیشِ نظر رکھنا چاہیے۔ ان کا کہنا تھا کہ پاکستان ایک پُرامن ملک ہے اور خطے میں امن و استحکام کا خواہاں ہے، تاہم قومی دفاع پر کسی قسم کا سمجھوتہ ہرگز قبول نہیں کیا جائے گا۔
انہوں نے واضح کیا کہ قومی سلامتی اور خودمختاری کے تحفظ کے لیے پوری قوم اپنی مسلح افواج کے شانہ بشانہ کھڑی ہے اور ہر چیلنج سے نمٹنے کی بھرپور صلاحیت رکھتی ہے۔
ڈاکٹر خالد محمود عراقی نے امریکہ اور اسرائیل کے گٹھ جوڑ سے ایران پر کیے جانے والے حملوں کی شدید مذمت کرتے ہوئے کہا کہ یہ کارروائیاں نہ صرف انسانی حقوق کی سنگین خلاف ورزی ہیں بلکہ کسی خودمختار ملک کی سالمیت کو نقصان پہنچانے کی مذموم کوشش بھی ہیں۔ ان کا کہنا تھا کہ اس نوعیت کے اقدامات بین الاقوامی قوانین اور عالمی اصولوں کے منافی ہیں۔
انہوں نے کہا کہ ایران شدید پابندیوں اور مشکل حالات کے باوجود اتحاد و یکجہتی کی روشن مثال قائم کیے ہوئے ہے۔ ایرانی قوم کے بلند حوصلے اور استقامت دیگر ممالک کے لیے ایک قابلِ تقلید نمونہ ہیں۔
بعد ازاں اساتذہ، طلبہ اور انتظامی عملے کی بڑی تعداد آرٹس لابی میں جمع ہوئی، جہاں شرکاء نے پُرجوش نعروں کے ذریعے پاک افواج کے ساتھ مکمل یکجہتی اور قومی اتحاد کے عزم کا اعادہ کیا۔
