کراچی( اسٹاف رپورٹر): بینک الفلاح لمیٹڈ اور برطانیہ کے ترقیاتی مالیاتی ادارے اور امپیکٹ سرمایہ کار برٹش انٹرنیشنل انویسٹمنٹ (بی آئی آئی) نے پاکستان میں موسمیاتی مالی معاونت (کلائمیٹ فنانس) کے فروغ اور توسیع کے لیے 50 ملین ڈالر کے سینئر ٹرم لون فنانسنگ معاہدے پر دستخط کر دیے۔
یہ شراکت داری ایسے وقت میں سامنے آئی ہے جب پاکستان بار بار آنے والے سیلاب، شدید موسمی حالات اور موسمیاتی خطرات کے باعث دنیا کے سب سے زیادہ متاثرہ ممالک میں شمار ہوتا ہے۔ اس تعاون کا مقصد ملک میں طویل المدتی موسمیاتی کے اثرات میں بہتری کو فروغ دینا، پائیدار اقتصادی ترقی کی حمایت کرنا اور موسمیاتی تبدیلی سے مطابقت، تحفظ اور اخراج میں کمی کے منصوبوں کے لیے درکار مالی وسائل کی کمی کو نجی شعبے کی سرمایہ کاری کے ذریعے پورا کرنا ہے۔
بینک الفلاح اس فنانسنگ کو پاکستان میں ایسے اہل موسمیاتی منصوبوں کی مالی معاونت بڑھانے کے لیے استعمال کرے گا جو زیادہ پائیدار اور موسمیاتی لحاظ سے محفوظ مستقبل سے ہم آہنگ ہوں۔ اس اقدام کے ذریعے مقامی کاروباری اداروں کو صاف، مضبوط اور ماحول دوست حل اپنانے، مثلاً موسمیاتی لحاظ سے موزوں زرعی طریقوں اور جدید آبپاشی نظام میں سرمایہ کاری کی سہولت ملے گی۔ یہ فنانسنگ زرعی کاروبار سے وابستہ اداروں کی بھی معاونت کرے گی، جو ملکی معیشت میں اہم کردار ادا کرنے کے باوجود موسمیاتی تبدیلی کے اثرات سے سب سے زیادہ متاثر ہونے والے شعبوں میں شامل ہیں۔ یہ اقدام دونوں اداروں کے پاکستان کی پائیدار ترقی کے اہداف سے وابستگی کا بھی مظہر ہے۔
سرمایہ کاری کے ساتھ بی آئی آئی تکنیکی معاونت بھی فراہم کرے گی تاکہ بینک الفلاح موزوں موسمیاتی منصوبوں کی نشاندہی اور ان کے لیے مالی وسائل کی فراہمی کی اپنی صلاحیت کو مزید مضبوط بنا سکے۔ اس سے ایسے منصوبوں کی مالی معاونت میں اضافہ ہوگا جو موسمیاتی تبدیلی کی وجوہات اور اس کے اثرات، دونوں سے نمٹنے میں معاون ثابت ہوں
