اسلام آباد(پریس ریلیز) پاکستان سنگل ونڈو (پی ایس ڈبلیو) اور لاہور یونیورسٹی آف مینجمنٹ سائنسز (لمز) کے درمیان پاکستان میں تجارتی نظام کو مؤثر بنانے، پیشہ ورانہ صلاحیتوں کے فروغ، اعلیٰ انتظامی تربیت اور تحقیق کے شعبوں میں تعاون کے لیے ایک مفاہمتی یادداشت (ایم او یو) پر دستخط کیے گئے ہیں۔
مفاہمتی یادداشت پر دستخط کی تقریب اسلام آباد میں پاکستان سنگل ونڈو کے دفتر میں منعقد ہوئی۔معاہدے پر پاکستان سنگل ونڈو کے چیف ایگزیکٹو افسر آفتاب حیدر اور لمز کے پرووسٹ ڈاکٹر طارق جدون نے دستخط کیے۔ اس موقع پر دونوں اداروں کے اعلیٰ حکام بھی موجود تھے، جبکہ لمز کے سلیمان داؤد اسکول آف بزنس (ایس ڈی ایس بی) کے ڈین ڈاکٹر محمد عدیل ظفر نے بھی تقریب میں شرکت کی۔
اس شراکت داری کے تحت پاکستان سنگل ونڈو اور لمز، فیڈرل بورڈ آف ریونیو (ایف بی آر) کے پوسٹ گریجویٹ ڈپلومہ (پی جی ڈی) پروگرام میں زیر تربیت اسسٹنٹ کلیکٹرز کسٹمز کی پیشہ ورانہ مہارتوں کو بہتر بنانے کے لیے مشترکہ طور پر کام کریں گے۔اس تعاون کا مقصد سرحد پار تجارت، ڈیجیٹل تجارتی نظام، لاجسٹکس، ڈیٹا گورننس اور پاکستان سنگل ونڈو سے متعلق دیگر شعبوں میں معلومات اور پیشہ ورانہ مہارتوں کو فروغ دینا ہے۔
دونوں ادارے باہمی اتفاق سے تربیتی پروگرام، تکنیکی تربیت، سیمینارز اور پیشہ ورانہ مہارتوں کو بہتر بنانے کی دیگر سرگرمیوں کا مشترکہ طور پر انعقاد کریں گے۔ اس شراکت داری کے تحت دونوں اداروں کے نمائندے ایک دوسرے کی کانفرنسوں، ورکشاپس، پالیسی ڈائیلاگ، نمائشوں اور دیگر پروگراموں میں شرکت کریں گے تاکہ باہمی تعاون بڑھے اور معلومات کا تبادلہ ہو سکے۔
اس مفاہمتی یادداشت کے تحت ڈیجیٹل تجارتی نظام، تجارت کو آسان بنانے، سرحد پار تجارتی نظام، لاجسٹکس اور ڈیٹا گورننس سے متعلق مشترکہ تحقیق، پالیسی سفارشات، تحقیقی جائزوں اور دیگر تحقیقی مواد کی تیاری کے لیے بھی ایک لائحۂ عمل طے کیا گیا ہے۔ توقع ہے کہ اس مشترکہ تعاون سے تحقیق کو فروغ ملے گا، حقائق کی بنیاد پر پالیسیاں بنانے میں مدد ملے گی اور پاکستان کے تجارتی نظام سے وابستہ متعلقہ اداروں اور افراد، بشمول پی جی ڈی پروگرام کے شرکا، کو بہتر رہنمائی فراہم کی جا سکے گی۔
تقریب سے خطاب کرتے ہوئے پاکستان سنگل ونڈو کے چیف ایگزیکٹو افسر آفتاب حیدر نے کہا،” جدید اور مؤثر تجارتی نظام کی تشکیل کے لیے پیشہ ورانہ مہارتوں اور علم کو مسلسل فروغ دینا ناگزیر ہے۔ لمز کے ساتھ ہماری شراکت داری اداروں کی صلاحیتیں بہتر بنانے، نئی سوچ کو فروغ دینے اور کسٹمز و تجارت کے شعبے کے مستقبل کے رہنماؤں کی تیاری کے لیے پاکستان سنگل ونڈو کے عزم کی عکاسی کرتی ہے۔”
لمز کے پرووسٹ ڈاکٹر طارق جدون نے کہا،”پاکستان سنگل ونڈو کے ساتھ شراکت داری ہمارے لیے باعثِ مسرت ہے۔ یہ تعاون اعلیٰ انتظامی تربیت اور ایسی تحقیق کو فروغ دے گا جو ملک کی ضروریات اور ترجیحات سے ہم آہنگ ہے۔ اس اشتراک کے ذریعے تعلیمی معیار اور عملی مہارت کو یکجا کرتے ہوئے بہتر تربیت کے مواقع فراہم کیے جائیں گے، جس سے پاکستان کے تجارتی اور کسٹمز نظام کو مزید مضبوط بنانے میں مدد ملے گی۔”
یہ مفاہمتی یادداشت پاکستان سنگل ونڈو اور لمز کے اس مشترکہ عزم کی عکاسی کرتی ہے کہ پیشہ ورانہ معیار کو بہتر بنایا جائے، تحقیق پر مبنی پالیسی سازی کو فروغ دیا جائے اور باہمی تعاون، علم کے تبادلے اور شراکت داری کے ذریعے پاکستان کے سرحد پار تجارتی نظام کو جدید خطوط پر استوار کیا جائے۔
